Generation Easyjet

Anfangs Sommer wurde der Autor dieses Blogs Zeuge folgendes Zugabteil-Gesprächs zwischen zwei junger Frauen. Der Autor kann den exakten Wortlaut jener Konversation allerdings nicht hundertprozentig garantieren.
Namen sind dem Autoren nicht bekannt (und ihm auch vollkommen egal).



„Ah das isch scho schön gsi...“

„Ja, das gloubi sofort!“

„Nei würkläch: Wenn e schöne Strand wottsch ha, de muesch uf d'Maledive. Au die Stränd hie si für nüt!“

„Ja, das hani ou scho ghört... Aber bi haut dä Früehlig scho in New York gsi... Aber isch ja zum Glück o nid so tüür gsi. Ha rächt viu gspart, wüui zersch uf Frankfurt gfloge bi u när vo dört uf New York.“

„Ah ja, das hani o scho mau gmacht; de bini vo Züri uf Mailand gfloge u när vo dört witer. Isch würkläch viu biuiger gsi!“

„Ja, die Flüg chönnt mä eh no chli biuiger mache. So wie bi Easyjet!“

„Das wär würkläch toll, ja!“

Kurzes Schweigen.

„U wo geisch jitz im Herbscht scho widr häre?“

„Nach Amerika. Auso zersch chli uf Florida, när Miami u vo Miami äuä no i d'Bahamas. Längt ächt ei Tag i de Bahamas?“

„Dänkes scho. Mir mache's jedefaus fasch immer so, dass mr eifach ei Tag i ere Stadt blibe u när i di nächschti Stadt göh. Muesch eifach chli luege, dass zum Schlaf chunnsch!“

„Stimmt, da hani denn in Thailand chli Müeh gha...“

„Wie gseit: Mi Trick heisst 'Temesta'!“

„Ah ja, genau, das hesch ja mau verzeut...“

„Das isch äbä scho no cool. Denn, woni mi Sprachufenthalt gmacht ha in Australie, hani praktisch ke Jetlag gha. Ha eifach dürepennet... Nid mau d'Stewardess het mi chönne wecke!“

Kurzes Gelächter.

„Hmm... Das chönnt mä eigentläch dr Kollegin vo mir o gäh...“

„Wiso meinsch?“

„Ja, si schluchzt u hüület immer so bim Flüge. Würkläch krass! Gloub, si het so haub Flugangscht oder so. Jedefaus wär das sicher no öppis für si. De chönnt mä sä ruhig steue... U i hätt o chli meh Rueh!“

Beide lachen laut auf.

„Di einti Kollegin vo mir isch drfür es haubs Jahr oder so in Malta gsi. U när het si e Prüefig gha ar... PA... äh... PH? Weiss es grad nid, irgendöppis mit „pädagogisch“ oder so... Uf jedefau het si ds 'First' nid bestande, wo du brüchtisch für ds Ungerrichte...“

„Oh shit...“

„Ja, i gloub, si het dört z'viu Dütsch gredt mit de andere, wo i dere Sprachschueu si gsi oder so... Uf jedefau isch si när haut es haubs Jahr uf Kanada gange. Aber si het när leider widr nid bestande...“

„Scheisse...“

„Ja, scho... Aber isch dört gloub glich no rächt chillig gsi für si.“